Пайвандҳои дастрасӣ

logo-print
Шабакаҳои иҷтимоӣ

"Ҷанг"-и Путин бо муҳоҷирати ғайриқонунӣ


Дар акс: Владимир Путин, нахуствазири Русия ва номзад ба мақоми раисиҷумҳури ин кишвар

Дар акс: Владимир Путин, нахуствазири Русия ва номзад ба мақоми раисиҷумҳури ин кишвар

Шаҳрвандони хориҷие, ки қонуни муҳоҷирати Русияро нақз мекунанд, 10 сол иҷозаи вуруд ба ин кишварро нахоҳанд дошт.

Владимир Путин, нахуствазир ва номзади аслӣ ба мақоми раисиҷумҳури Русия гуфт, хориҷиёнеро, ки қонунҳои кор ва муҳоҷирати ин кишварро риоят намекунанд, нахоҳанд гузошт, то вориди Русия шаванд.

Ӯ ин нуктаро рӯзи панҷшанбе, 26 январ, зимни суханони худ дар Хадамоти федеролии муҳоҷирати Русия дар шаҳри Маскав баён дошт.

Путин афзуд, "мо ба Хадамоти муҳоҷират, ниҳодҳои интизомӣ, яъне вазорати дохилӣ ва Хадамоти федеролии амният, минтақаҳо ва соҳибкороне ниёз дорем, ки кори худро дақиқ ҳамоҳанг кунанд ва бигӯянд, ки ба чӣ касбу коре ниёз доранд ва дар кадом минтақа.”

Нахуствазири Русия пешниҳод кард, ба ҳар шаҳрванди хориҷӣ, ки қонуни муҳоҷирати ин кишварро нақз кардааст, бояд ба муддати 10 сол иҷозаи вуруд ба Русия дода нашавад.

Путин барои интихоботи 4 марти соли ҷорӣ ба мақоми раёсати ҷумҳурӣ номзад пешбарӣ шудааст. Русия бо аксари кишварҳои Шӯравии пешин, аз ҷумла бо Тоҷикистон муқаррароти раводид надорад ва аз ин кишварҳо миллионҳо муҳоҷир дар Русия кор мекунанд.

Ин дар ҳолест, ки бино ба хабари матбуоти Русия, дар маркази шаҳри Маскав пулис хобгоҳеро, ки дар он 287 нафар муҳоҷирони ғайриқонунӣ мезистанд, бастааст. Дар он шаҳрвандони Русияву Узбакистон, Украинаву Молдова ва Тоҷикистону Беларус зиндагӣ мекардаанд. 14 нафари онҳо шаҳрвандони Тоҷикистон будаанд.

Дар ин бора дафтари матбуотии пулиси Маскав хабар додааст. Муҳоҷирон гуфтаанд, ки дар интернет маълумотро дар бораи иқомат дар ин хобгоҳ пайдо кардаанд. Онҳо ҳангоми вуруд ба ин хобгоҳ барои як шабонарӯз 100 рубли русӣ пардохт мекардаанд.

Намоиши шарҳҳо

XS
SM
MD
LG