Пайвандҳои дастрасӣ

Паҳлавонони тоҷик дар мусобиқаи қаҳрамонии Осиё дар риштаи самбои варзишӣ дар пойтахти Узбакистон - шаҳри Тошканд 23 медал ба даст оварданд.

Ба иттилои Маҳмуди Абдуллоҳ, раиси Федератсияи самбои Осиёи Марказӣ ва ҳамзамон дабири кулли Федератсияи самбои Тоҷикистон, дар сабқати қитъавӣ байни мардону занон, ҷавонону наврасон беш аз 300 варзишгари 18 кишвари қора иштирок дошт. Ба ҳайати дастаи мунтахаби Тоҷикистон 35 гуштигир шомил буд.

Дар сабқати самбои варзишӣ байни мардон Фурқат Назриев дар вазни то 90 кг бо медали тилло мукофотонида шуд. Акмалиддин Каримов дар вазни то 52 кг медали нуқра гирифт. Мустафо Ҳасанов дар вазни то 68 кг соҳиби медали биринҷӣ шуд.

Дар сабқати занон Дилбархон Султонова, Муҳаббат Надирматова ва Насиба Алиматова бо медалҳои биринҷӣ сарфароз гаштанд.

Дар сабқати ҷавонон Сайёд Шайхов дар вазни то 74 кг ба унвони қаҳрамонӣ даст ёфт. Зайналобуддини Аъзамхон дар вазни то 82 кг барандаи медали нуқра шуд.

Боз чаҳор нафари дигар – Бегиҷон Ҳалимов (то 48 кг), Сӯҳроб Мӯъминов (то 52 кг), Нозимҷон Охиров (то 57 кг) ва Умед Раҳматуллоев (то 60 кг) бо медалҳои биринҷӣ сарфароз гаштанд.

Дар сабқати наврасон Хушқадам Хисравов (то 56 кг), Комроншоҳи Устопириён (то 81 кг) ва Қандилҷони Рустамҷон (то 87 кг) медалҳои тилло ба даст оварданд. Искандар Ашӯров (то 75 кг) медали нуқра гирифт.

Чаҳор нафар - Азизи Муҳаммадризвон (то 48 кг), Юсуфҷон Зоиров (то 60 кг), Сино Маҳмадёров (то 70 кг) ва Аминҷон Шарифов (+87 кг) бо медалҳои биринҷӣ сарфароз гаштанд.

Дар сабқати ситораҳои самбо Акмалиддин Каримов (то 52 кг), Сулаймон Сулаймонов (то 74 кг) ва Фаридун Устопиров (то 100 кг) ҷойҳои аввалро касб карданд.

Вале дар мусобиқаи қитъавӣ оид ба самбои размӣ намояндагони Тоҷикистон аз медалҳо бенасиб монданд.

Намоиши шарҳҳо

XS
SM
MD
LG