Сафари панҷрӯзаи Николай Бордюжа, дабири кулли созмони Паймони амнияти дастаҷамъӣ (СПАД) ба Тоҷикистон имрӯз аз дидори шаҳри Қайроқум ва ширкаташ дар нишасти дабирони Шӯроҳои амнияти кишварҳои узви ин паймони низомӣ оғоз ёфт. Масоили амнияти минтақа, авзоъ дар марзҳои Осиёи Марказӣ ва Афғонистон аз мавзӯъҳои асосии ин ҳамоиш ном бурда мешавад. Бино ба хабарҳо, Бордюжа рӯзҳои 16 ва 17 март дар Душанбе дар нишасти гурӯҳи кории махсуси Афғонистон дар Шӯрои вазирони хориҷаи СПАД низ ширкат хоҳад кард.
