Пайвандҳои дастрасӣ

"Медиа Алянси Тоҷикистон" кормандони норозӣ ва муассиси ҳафтаномаи "Вечерний Душанбе"-ро ба созиш хонд.

Созмони хабарнигории Медиа Алянси Тоҷикистон бо нашри як изҳорот аз ихтилофи ба вуҷудомада миёни ҳайъати кормандони "Вечерний Душанбе” бо муассиси он, ки боиси аз кор рафтани ҳайъати эҷодии он гардид, изҳори нигаронӣ кардааст.



Дар ин изҳороти Медиа Алянс омадааст, ки ин зиддият ва ихтилоф метавонад мунҷар ба бекор мондани ҳайъати эҷодии ин нашрия шавад.

Аз ин рӯ, ин созмони хабарнигорӣ ҷустани гунаҳгор ва айбдоркуниҳои дуҷонибаро роҳи ҳалли масъала надониста, баръакс, аз ҷонибҳо даъват кардааст, ки ҳамдигарфаҳмӣ намоянд.

Истеъфои кормандони "Вечерний Душанбе"

Кормандони ҳафтаномаи “Вечерний Душанбе” бо шикоят аз бархӯрди муассиси нашрия рӯзи 19-уми январ дастаҷамъона ба истеъфо рафтаанд.

Кормандони рӯзномаи русизабони «Вечерний Душанбе» дар баёнияи худ гуфтаанд, ки музокироти онҳо бо муассис дар мавриди ҳалли қазия натиҷа надодааст ва онҳо маҷбур ба қатъи ҳамкории худ бо Муассисаи «Чархи гардун» шудаанд, ки «ВД» низ дар ҳайати ин муассиса мебошад.

Гулнора Амиршоева, сардабири акнун собиқи «Вечерний Душанбе» дар сӯҳбате бо Озодӣ гуфт, ки зарфи чанд ҳафтаи ахир чандин корманди ин ҳафтанома аз сӯи Акбаралӣ Саттор, молики Ҷамъияти «Чархи гардун» аз кор ихроҷ шуданд. Ва агар барномаи ихтисор давом мекард, ҳамин тавр ба сурати табии, ҳафтаномаи бидуни ҳайати эҷодӣ мемонад ва фаъолияташ қатъ мешуд.

Хонум Амиршоева гуфт: «Зарфи ним соли охир мо дар як ҳолати муаллақ кор мекардем. Зеро пайваста сару садоеро аз сӯи муассиси «ВД» мешунидем, ки эҳтимоли бастани ин ҳафтанома вуҷуд дорад. Ӯ ба пешниҳоди мо, ки ҳафтаномаи «ВД»-ро ба ихтиёри ҳайати эҷоди бидиҳад, посухи рад дод. Ва пешниҳод кард, ки бар ивази пули зиёде мо онро харидорӣ кунем. Аммо мо чунин маблағро дар ихтиёр надорем. Ва баъди соли нав шумораи кормандони ҳафтнома ихтисор карда шуд. Ӯ беасос ба фаъолияти кормандон эрод мегирифт, ҳуқуқи мо ба кор ва кафолатҳои иҷтимоиро вайрон мекард. Ва мо бо як тасмими дастаҷамъона қарор додем, ки ҳайати «Чархи гардун» хориҷ шавем ва худамон ҳафтнамои «ВД»-ро мустақилона нашр кунем. Аммо боз ҳам фиреб хӯрдем, муассис ҳадафаш халос шудан аз мо ва нашри рӯзнома аз сӯи худаш будааст».

Аммо Акбари Саттор, муассиси Ҷамъияти «Чархи гардун» ҳама гуна фишор болои ҳайатои эҷодии ҳафтаномаи Вечений Душанбе» аз сӯи худро рад мекунад. Ӯ мегӯяд, дар ин кормандон ба далели пеш омадани сӯитафоҳум дар марвиди усулҳои корӣ даст ба чунин иқдоме задаанд.

Оқои Саттор мегӯяд: «Эътирози асосӣ он аст, ки мо мехоҳем дар баробари «ВД» ба забони тоҷикӣ як рӯзномаи дигар роҳандозӣ кунем. Барои он, ки бозори рӯзномаи русӣ танг шудааст. Азбаски онҳо чандон ба забони тоҷикӣ балад нестанд, шояд ҳарос пайдо карданд ва фурсатро муносиб донистанд, ки пеш аз баста шудани рӯзнома раванд ва фикр карданд, ки шояд барои онҳо бурд шавад. Дар бораи фишор бояд бигӯям, ки агар фишоре мебуд, сардабири ин рӯзнома дар як сол даҳ мартаба иҷозаи рафтан ба сафари хориҷаро пайдо намекард. Вақте даҳ маротиба ба хориҷа сафар мекунад, аз кадом фишори корӣ метавон сухан гуфт».

Аз сӯи дигар, ҳайъати эҷодии «ВД» дар ҳоле, ки аз корфармои худ, Акбари Саттор шикоят мекунад, ки оқои Саттор ҳамчунин раиси Иттиҳодияи журналистони Тоҷикистон низ ҳаст ва ин иттиҳодия бояд манофеъи журналистонро дар чунин ҳолате ҳимоят кунад. Ба гуфтаи коршиносон, дар чунин марвид як навъ бархӯрди манофеъ миёни корфармо ва созмони ҳимоят аз журналистон пеш меояд. Ҳамза Ҳакимзода, ҳуқуқдони тоҷик мегӯяд, роҳи оқилонаи ҳали масъала дар чунин маврид корбурди дурусти оинномаҳои ҳам муассисаи корфармо ва ҳам иттиҳодияи журналистӣ мебошад.

Аммо Акбари Саттор мегӯяд, ки ӯ ҳафтаномаи «ВД» -ро фурӯхтанӣ нест ва бо вуҷуди аз кор рафтани ҳайати эҷодии ин нашрия, талош дорад, дар вақти маъмулӣ, яъне то фардо «ВД» чоп кунад ва ба дасти хонанда бирасонад.

«ВД» ба унвони танҳо рӯзномаи баъд аз зӯҳр ё шоми Душанбе аз соли 1968 то соли 1992 ҳамчун органи нашаротии созмони Ҳизби коммунист дар Душанбе ба сурати муназзам нашр мешуд. Ва аз соли 1996 дар ҳайати Ҷамъияти «Чархи гардун» ҳафтае як бор нашр мешавад.

Намоиши шарҳҳо

XS
SM
MD
LG