Пайвандҳои дастрасӣ

logo-print

Бо ҳадафи боло бурдани сифати таълим дар макотиби таҳсилоти умумии Тоҷикистон парлумони кишвар тарҳи иловаҳо ба қонун дар мавриди гузариш ба низоми таълими 12-соларо қабул кард.

Интизор меравад, ки низоми нави таълим дар кишвар марҳила ба марҳила ҷорӣ шавад ва аз моҳи сентябри соли равон мӯҳлати таҳсил дар тамоми макотиби миёнаи 9-сола як соли дигар тамдид ёбад. Солҳои 2014-2015 қабули хонандаҳо ба мактаб аз синни 6 шурӯъ хоҳад шуд ва дар солҳои 2016-2017 мактабҳои Тоҷикистон бояд пурра ба низмои таълими 12-сола хоҳанд гузашт.

Баҳси низоми нави таҳсил 2 соли пеш шурӯъ шуда буд ва дар пайёми ахири худ президенти кишвар аз он ҷонибдорӣ кард. Абдуҷаббор Раҳмонов, вазири маорифи Тоҷикистон, низ дар ҷаласаи ахири парлумони кишвар гуфт, барои мутобиқ кардани сатҳи таълим ба меъёрҳои ҷаҳонӣ низоми таҳсили 12-сола зарур астд. Ба гуфтаи ӯ, ин навъи тадрис метавонад ба падидаи тарки таҳсил кардани хонандагон хотима гузорад.

Ба гуфтаи бархеи коршиносон, бартарии дигари низоми 12-сола дар он аст, ки хонанда имкон пайдо мекунад, барномаи соли аввали донишгоҳро дар мактаби миёна омӯхта, барои таҳсил дар мактаби олӣ омода шавад.

Аксари таҳлилгарони ҷавон ҳам таълимоти 12-соларо беҳтари низоми тадрис медонанд, аммо бо таваҷҷӯҳ ба вазъи феълии соҳаи маориф ва мушкилоти фаровони он, аз ҷумла камбуди омӯзгорон ва ҷои нишасту мактаб, аз тасмими гузариш ба низоми 12-сола истиқбол намекунанд. Ба ақидаи онҳо, дар ҳоли ҳозир ҷалби омӯзгорони ҳирфаӣ ва беҳтар кардани шароити молии макотиби миёна муҳимтар аст.

Бо ҷорӣ шудани низоми нав то соли 2016 дар макотиби кишвар шумори хонандагон ба беш аз 2 миллион хоҳад расид ва зарурати ифтитоҳи беш аз 12 ҳазор синфхонаҳои нав пеш хоҳад омад. Аммо ба гуфтаи вазири моариф, дар ҳамдастӣ ва ҳамкорӣ бо дигар сохторҳои ҳукуматӣ метавон то соли 2017 низоми 12 соларо дар кишвар ҷорӣ кард. Ба қавли ӯ барои ба пуррагӣ гузаштан ба низоми нави таълимӣ вазорати маориф ба 356 миллион сомонӣ ниёз дорад.

Вале ин ҳама гуфтугузорҳо дар мавриди ҳатмӣ кардани таҳсил то синфи 10-ум ва баъдан ҷорӣ шудани таҳсили 12- сола дар ҳолест, ки аксари хонандагони макотиби миёна аз он ҷонибдорӣ намекунанд. Онҳо боз як соли дигар тамдид кардани таҳсилро сарфаи беҳудаи вақт меноманд.

Тибқи иттилои Бунёди атфоли СММ, 25 дарсади духтарони тоҷик аз синфи 7 ва 8 таҳсилро тарк мекунанд. Ҳонгвей Гао, раҳбари Бунёди атфоли СММ, гуфт, илова кардани боз як сол ба таҳсил наметавонад барои ҷалби кӯдакон ба мактаб мусоидат кунад.

Хонуми Ҳангвей Гао мегӯяд, муҳим на мӯҳлат ва сол, балки сифати таҳсил аст. Вале ӯ аз тасмими ҷалби хонандаҳо аз синни 6-солагӣ ба мактаб дастгирӣ мекунад, зеро хонанда дар синнй 5 ва 6-солагӣ ҳофизаву қобилияти беҳтари омӯхтану аз худ карданро дорад.

Аммо хонандагону бархе аз омӯзгорони макотиби миёнаи Тоҷикистон дар шароити феълӣ бозгашт ба таҳсили 10-солаи таҷрибаи замони шӯравиро беҳтару муассиртар мехонанд, низомеро, ки замоне худи онҳо мувофиқи он таҳсил ва хатми мактаб карданд.

Намоиши шарҳҳо

XS
SM
MD
LG