Пайвандҳои дастрасӣ

Рӯзи 17-уми апрел дар шаҳри Душанбе ба муносибати Рӯзи пойтахти Тоҷикистон нахустин ниммарафони байнулмилалӣ баргузор хоҳад шуд.

Раҳматшо Камолов, мудири бахши варзиши Раёсати ҷавонон, варзиш ва сайёҳии шаҳри Душанбе, бо эълони ин хабар ба радиои Озодӣ гуфт, «дар ин пойгаи давандаҳо, ки бо қарори раиси шаҳри Душанбе Маҳмадсаид Убайдуллоев доир мешавад, варзишгарони бародаршаҳрҳои пойтахти Тоҷикистон ширкат хоҳанд кард. Ҳоло намояндагони шаҳрҳои Маскав ва Санкт-Петербурги Русия, Анқараи Туркия, Урумчии Чин, Бишкеки Қирғизистон ва Остонаи Қазоқистон барои ширкат дар ин пойга розигӣ додаанд. Дар ин сабқат, ҳамчунин, ширкати варзишгарони шаҳрҳои Теҳрону Шерози Ҷумҳурии Исломии Эрон ва намояндагони Афғонистон дар назар аст. Вале аксари кулли ширкаткунандагони пойгаро варзишгарони тоҷик ташкил медиҳанд, ки манотиқи мухталифи кишварро намояндагӣ хоҳанд кард».

Оқои Камолов афзуд, ниммарафон, ки масофаи 21 километрро дар бар мегирад, аз рӯи масири дав - дидбонгоҳи Чорбоғ – хиёбони Ҳофизи Шерозӣ - маҳаллаи Хоҷамбиё – Боғи ботаникӣ - хиёбони Рӯдакӣ - майдони «Дӯстӣ» (назди ҳайкали Исмоили Сомонӣ) – доир хоҳад шуд.

Ба иттилоъи Раҳматшо Камолов, ғолибони пойга бо мукофоти пулии мақомоти иҷроияи маҳаллии ҳокимияти давлатии шаҳри Душанбе сарфароз мешаванд. Ба ғолибони пойга байни мардону занон 3500-долларӣ супурда хоҳад шуд. Онҳое, ки ҷойҳои дуввумро касб мекунанд, 3000 долларӣ мегиранд. Барои ҷойҳои сеюм 2500 долларӣ, барои ҷойҳои чаҳорум 2000 долларӣ, барои ҷойҳои панҷум 1800 долларӣ ва барои ҷойҳои шашум 1500 долларӣ муқаррар шудааст.
XS
SM
MD
LG