Пайвандҳои дастрасӣ

logo-print

Додгоҳи олии Тоҷикистон ҳукми 56 нафар аъзои Ҷамоаи таблиғро содир карда, даҳҳо нафари онҳоро ба солҳои гуногун равонаи зиндон намуд.

Фаррух Малахов, сухангӯи Додгоҳи олии Тоҷикистон, дар сӯҳбат бо радиои Озодӣ гуфт, аъзои ин гурӯҳ бо айби таъсиси Ҷамоаи таблиғ гунаҳкор ва маҳкум шудаанд.

Вай афзуд, 23 узви ин гурӯҳ бо мӯҳлатҳои гуногун аз озодӣ маҳрум шуданд ва нисбати боқӣ 33 нафар ҳукми додгоҳ бо намуди ҷарима содир гардид.

Гурӯҳи 56-нафарии таблиғиҳо соли гузашта боздошт шуда буданд ва мурофиаи додгоҳии онҳо пушти дарҳои баста дар яке аз зиндонҳои шаҳри Душанбе ҷараён дошт.

Ба гуфтаи коршиносон, созмони "Ҷамоаи таблиғ" шаш сол боз дар Тоҷикистон фаъол аст. Соли 2006 Додгоҳи олии Тоҷикистон ин гурӯҳро ҳамчун созмони ифротгаро шинохта, дар феҳристи созмонҳои мамнӯъ ва террористиву экстремистӣ ҷой дод.

Вале "Ҷамоаи таблиғ" пас аз боздошти садҳо пайравони он дар соли гузашта мавриди таваҷҷӯҳи ҷомеа ва расонаҳо қарор гирифт.

Моҳи апрели соли 2009 дар яке аз масҷидҳои шаҳри Душанбе 124 таблиғӣ дастгир шуданд, вале баъдан мақомот эълом доштанд, ки танҳо алайҳи 4 нафари онҳо парвандаи ҷиноӣ боз кардаанд.

Ҳоло баррасии парвандаи як гурӯҳи бузурги 36-нафарии таблиғиҳо дар додгоҳи Қӯрғонтеппа идома дорад.

Аммо иддае аз шахсиятҳои мазҳабии Тоҷикистон боздошт ва муҳокимаи аъзои Ҷамоаи таблиғро, ки ба гуфтаи онҳо, бо тарғиби мусолиматомези дини ислом дар Тоҷикистон машғул буданд, дуруст намеҳисобанд.

Аз ҷумла Ҳоҷӣ Акбар Тӯраҷонзода, узви Маҷлиси Миллии Тоҷикистон ва рӯҳонии саршинос, ахиран ба Додгоҳи олии Тоҷикистон пешниҳод кард, ки қарори худ дар бораи ба феҳрасти созмон ва ҳаракатҳои ифротгаро ва террорист ворид кардани «Ҷамоати Таблиғ» -ро бекор кунад.

Муҳиддин Кабирӣ, раҳбари Ҳизби наҳзати исломии Тоҷикистон, низ аз ин пешниҳод истиқбол карда буд.

Вале Додситони кулли Тоҷикистон бознигарии қарор дар бораи «Ҷамоати Таблиғ»-ро ғайримумкин арзёбӣ кард.

Машваратдодашуда

Намоиши шарҳҳо

XS
SM
MD
LG