Пайвандҳои дастрасӣ

Ҳизби сотсиал-демократи Тоҷикистон тасмим гирифтааст, ки номзадии Раҳматулло Зойиров, раиси ин ҳизбро барои ширкат дар интихоботи парлумонӣ тавассути ҳавзаи инфиродӣ пешниҳод кунад.

Дар як баёнияе, ки ин ҳизб мунташир кардааст, гуфта мешавад, ки Шӯрои сиёсии Ҳизби соnсиал-демократи Тоҷикистон дар ҷаласаи ахири худ ба чунин натиҷа расидааст, ки номзадии раиси худро аз ҳавзаи интихоботии Синои пойтахт барои ишғоли курсии вакилӣ дар Маҷлиси намояндагон пешниҳод кунад.

Ҳизби сотсиал-демократи Тоҷикистон қаблан феҳрасти номзадҳои худ барои ширкат дар интихоботи парлумониро муаррифӣ карда буд, ки номи Раҳматулло Зоиров дар аввали ин рӯйхат аст. Шӯрои сиёсии ҲСДТ дар ҷамъ номзадии 22 намояндаи худро тасдиқ ва ба КМИР ироа кардааст.

Аммо Раҳматулло Зоиров, раиси ҲСДТ, гуфт, бо таваҷҷӯҳ ба ин ки шояд бархе аз ин номзадҳо аз ҳавзаҳои инфиродӣ низ номзад шаванд, имкон дорад, шумори номзадҳо дар феҳрасти ҳизбӣ коҳиш пайдо кунад.

Марҳалаи пешниҳоди номзадҳои интихоботӣ барои ҳавзаҳои якмандатӣ ва ё инфиродӣ бар пояи муқаррароти мавҷуда аз 30 декабр оғоз шуда ва то миёнаи январи соли ҷорӣ идома хоҳад дошт.

Дар ин миён номзадҳои мустақил ва муддаиёне, ки аз сӯи аҳзоб пешниҳод шуданд, бояд 500 имзо барои дастгирии худ ҷамъоварӣ карда, ҳамчунин аснод дар бораи вазъи сиҳатӣ ва эъломияи оидоти худро ба комиссияҳои ҳавзавӣ ироа кунанд.

Намоиши шарҳҳо

XS
SM
MD
LG