Пайвандҳои дастрасӣ

Таърихи фурӯши саҳмияҳои «Роғун» эълон шуд


Саҳмияҳои нерӯгоҳи "Роғун" дар ҳузури намояндагони ниҳодҳои бонкӣ ва молии кишвар муаррифӣ шуд

Саҳмияҳои нерӯгоҳи "Роғун" дар ҳузури намояндагони ниҳодҳои бонкӣ ва молии кишвар муаррифӣ шуд

Вазорати молияи Тоҷикистон эълом кардааст, ки саҳмияҳои нерӯгоҳи «Роғун» ба маблағи 6 миллиард сомонӣ бароварда шуда ва омодаи фурӯш ҳастанд.

Ин матлаб имрӯз, 25-уми декабр, зимни муаррифии саҳмияҳои манзурӣ ва гувоҳномаҳои саҳмияҳои номӣ дар Вазорати молия бо ширкати ниҳодҳои бонкӣ ва молии кишвар баён гардидааст. Ҳамчунин замони оғози фурӯши саҳмияҳо дар саросари ҷумҳурӣ 6 январи соли 2010 таъин шудааст.

Ин дар ҳолест, ки 6 январи соли оянда аз ҷониби вакилони Маҷлиси шаҳри Душанбе Рӯзи ваҳдати сокинони пойтахти Тоҷикистон ҷиҳати бунёди неругоҳи «Роғун» эълом шудааст. Ба ин муносибат баргузории тадбирҳои идона дар чаҳор ноҳияи шаҳри Душанбе, ҳамзамон бо фурӯши саҳмияҳо дар нуктаҳои вижа дар назар аст.

Саҳмияҳои Ҷамъияти Саҳҳомии Кушодаи неругоҳи барқӣ-обии «Роғун» тавассути Сафаралӣ Наҷмиддинов - вазири молия, Шариф Раҳимзода - раиси Бонки миллӣ ва мақомоти «Амонатбонк», ки масъулияти фурӯши ин қоғазҳои қимматдорро дорад, муаррифӣ шуданд. Таъкид шуд, ки саҳмияҳо бо арзиши номиналии 100, 500, 1000 ва 5 ҳазор сомонӣ, ки саҳмияҳои манзурӣ ҳастанд, бароварда шуда ва шаҳрвандони Тоҷикистон ҳаққи харидории онро доранд.

Сафаралӣ Наҷмиддинов, вазири молияи Тоҷикистон, мегӯяд, саҳмияҳои "Роғун" бо коғази русӣ дар дохили кишвар чоп шудаанд
Ба гуфтаи вазири молияи Тоҷикистон, саҳмияҳои манзурӣ ва гувоҳномаҳои саҳмияҳои номӣ дар дохили кишвар чоп шуда, танҳо ашёи хоми он, яъне қоғаз, аз Русия оварда шудааст. Масъулони Вазорати молия дар мавриди маблағи харҷшуда барои иҷрои ин кор изҳори назаре накарданд, аммо Сафаралӣ Наҷмиддинов гуфт, «дар маҷмӯъ саҳмия 5 миллион адад, ки аз он се миллион адад 100-сомонӣ, як миллион 1000-сомонӣ, 800 ҳазор адад 5 ҳазорсомонӣ ва 600 ҳазор саҳмияҳои номӣ бароварда шудааст, аммо маблағи умумии саҳмияҳои бароварда шуда 6 миллиард сомониро ташкил медиҳад, ки маблағи ойиномавиии Ҷамъияти Саҳҳомии Кушодаи Неругоҳи барқӣ - обии «Роғун» аст».

Ба гуфтаи мақомоти Вазорати молияи Тоҷикистон, фурӯши саҳмияҳо дар саросари ҷумҳурӣ аз 6 январи соли 2010 оғоз хоҳад шуд, ки Бонки давлатии «Амонатбонк» ин корро амалӣ мекунад. Ин аст, ки Абдуқаҳҳор Қодиров, муовини раиси ин Бонк, зимни муаррифии саҳмияҳо гуфт, дар саросари кишвар 583 нуқтаи фурӯш боз карда мешавад, ки аз он 47 адад дар шаҳри Душанбе хоҳад буд.

Ин дар ҳолест, ки иҷлосияи Маҷлиси вакилони шаҳри Душанбе, ки ду рӯзе қабл сурат гирифт, таърихи 6–уми январро Рӯзи ваҳдати сокинони пойтахт ҷиҳати бунёди нерӯгоҳи «Роғун» эълом кард. Дар иҷлосияи вакилони Маҷлиси шаҳрӣ қарор шудааст, то дар ин рӯз дар ҳар чаҳор ноҳияи пойтахт чорабиниҳои ҷашнӣ доир шаванд.

Ҳамчунин, интизор меравад, расонаҳои расмии шаҳрдорӣ - ҳафтаномаи «Паёми Душанбе» ва шабакаи телевизионии «Пойтахт» дар таблиғи ин тадбири муҳим саҳми муассир бигзоранд. Ин дар ҳолест, ки муддати як моҳ боз матбуот ва расонаҳои давлатии Тоҷикистон, корзори таблиғотиеро дар заминаи саҳмгирӣ аз тариқи ироаи маблағҳои хайрия ва харидории саҳмияҳо барои бунёди нерӯгоҳи «Роғун» роҳандозӣ карда ва одамони афроди касбу кори гуногун ҳамраъйии хешро дар ин иқдом баён мекунанд.

Шариф Раҳимзода, раиси Бонки миллии Тоҷикистон, даъват кард, ки аз мавридҳои эҳтимолии тақаллубкории саҳмияҳо ҷилавгирӣ шавад
Аммо Шариф Раҳимзода, раиси Бонки миллии Тоҷикистон, аз кормандони ниҳодҳои бонкӣ ва молии кишвар ва мардум давъат ба амал овард, ки бештар ба ҷанбаҳои ҳимояи саҳмияҳо ва ҷилавгирӣ аз мавридҳои эҳтимолии тақаллубкорӣ дар раванди харидуфурӯши саҳмияҳо таваҷҷӯҳ кунанд,. Зеро Раҳимзода бар ин назар аст, ки эҳтимол дорад, саҳмияҳо тавассути афроди алоҳида нусхабардорӣ шуда ва ба фурӯш гузошта шаванд.

Вай афзуд, «бисёр зарур аст, ки ҳама кормандони бонк ва мардум бидонанд, ки осори ҳимояи саҳмияҳо чи гуна аст, то онҳо саҳмияро аз сурати он фарқ карда тавонанд. Чун замоне, пули миллиро баробарда будем, ба мардум нафаҳмонда будем, ки чи гуна пулро аз сурат фарқ бояд кард. Зеро ҳоло техника ва технологияи пешрафта аст, ки озод метавонанд сурат гиранд ва дар ду тарафи қоғаз ҷо кунанд. Ба ин хотир бояд ба мардум фаҳмонем, ки чи гуна бояд саҳмияҳо шинохта шавад, то тақаллубкорӣ сурат нагирад».

Таъкиди раиси Бонки миллии Тоҷикистон ба он буд, ки бар асоси муқаррарот, саҳмиядор дар сурати лозим метавонад саҳмияашро дар бозори озоди қоғазҳои қимматдор бифурӯшад. Ин дар ҳолест, ки вазири молияи Тоҷикистон гуфт, дар канори он, ки саҳмияҳо қоғазҳои қимматдор ҳастанд, аз сӯи дигар чаҳор дараҷаи муҳофизатиро доро мебошанд.

Ҳамзамон таъкид гардид, ки фурӯши саҳмияҳо озод ва ба тариқи нақдӣ ва ғайринақдӣ сурат гирифта, барои харидории саҳмияҳои арзиши номиналии 100, 1000 ба 5 ҳазор сомонӣ аз шаҳрванд ҳеҷ гунна ҳуҷҷате талаб карда намешавад. Аммо гувоҳномаи саҳмияҳои номӣ, ки маблағашон беш аз 5 ҳазор сомониро ташкил медиҳад аз ҷониби Вазорати молия бо тариқи бақайдгирӣ ва номнависӣ дода мешаванд. Харидории саҳмияҳо маҷбурӣ набуда ва ба таъкиди раиси Бонки миллии Тоҷикистон, саҳмияҳо кафолати давлатро доранд.

Ба таъкиди Шариф Раҳимзода, бо фаъол шудани нерӯгоҳи «Роғун» ва даромад гирифтани он саҳмиядорон метавонанд маблағи саҳмияи худро аз бонкҳо бозпас бигиранд ва эҳтимол дорад, арзиши саҳмияҳо дар он замон ба маротиб бештар шавад. Зеро ба гуфтаи раиси Бонки миллӣ, нархи нерӯи барқ дар бозори ҷаҳонӣ дар ҳоли афзоиш аст.

Ин дар ҳолест, ки дар 1996 маъракаи саросарии фурӯши саҳмияҳои нерӯгоҳи барқи обии «Сангтӯда» ба роҳ монда шуда буд, аммо бо гузашти қариб ду сол аз фаъол шудани ин нерӯгоҳ то ҳанӯз тақдири маблағҳои саҳмиядорон, ба хусус мардуми оддӣ, ки дастаҷамъона харидорӣ карда буданд, маълум нест.

Намоиши шарҳҳо

XS
SM
MD
LG