Вакилони ироқӣ бо тасвиби тарҳи ислоҳшудаи Қонуни интихобот, роҳро барои баргузории интихоботӣ порлумонӣ дар соли оянда боз карданд. Аёд Ал-Самморай – сухангӯи порлумони Ироқ эълом кард, ки Шӯрои Намояндагон қонуни мазкурро пазируфтааст, аммо нагуфт, ки чанд нафар раъйи мухолиф ва ё раъйи мувофиқ додаанд. Зоҳиран намояндагони ҷиноҳҳои сиёсии порлумони Ироқ, барои рафъи мухолифати Тариқ Ал-Ҳошимӣ, ки қонуни интихоботи Ироқро вето гузошт, ба гузашт розӣ шудаанд. Тариқ Ал-Ҳошимӣ бо зикри пешбинӣ нашудани курсиҳои кофӣ дар порлумон барои ироқиёни хориҷ аз кишвар, қонуни интихоботро вето гузошта буд.