Раҳбарони кишварҳои гурӯҳи Ҷи 20 дар шаҳри Питсбурги Амрико ҷамъ омада ва шеваҳои вокуниш ба бӯҳрони ҷаҳонии молиро баррасӣ мекунанд. Тимотӣ Гейтнер – вазири дороии Амрико гуфт, ислоҳи низоми печидаву ношафофи молӣ, ки маҳз ҳамин низом иқтисоди дунёро гирифтори бало кард, аз авлавиятҳои кори Барак Обама – раиси ҷумҳури Иёлоти Муттаҳида будааст. Пештар аз ин Ангела Меркел – садри аъзами Олмон ҳушдор дод, ки саъйи Амрико барои тағйири тавозуни иқтисоди ҷаҳонӣ, таваҷҷӯҳи кишварҳои гурӯҳи G-20-ро аз тадбирҳои фаврӣ барои ислоҳи иқтисод ба дигар тараф мекашад.