Пайвандҳои дастрасӣ

Ҳамлаи полиси Эрон ба эътирозгарон


Имрӯз дар Теҳрон полиси Эрон ба хотири пароканда кардани эътирозгарон ба сӯи онҳо бо гази ашковар ҳамла карда ба ҳаво оташ кушоданд. Муқовиматҳои миёни полис ва эътирозгарон соатҳо баъди таҳдиди посдорони инқилоби исломӣ сар зад, ки аз такрор раҳпаймоиҳои мухолифин дар як изҳорот ҳушдор дода буд.
Дар изҳороте, ки имрӯз дар сомонаи интернетии посдорон нашр шудааст, аз эътирозгарон даъват мешавад, ки ба "коршиканиву фаъолиятҳои шӯришӣ" хотима диҳанд, чунки муқовимати онҳо ҳамчун тавтеа ё нақшаи хиёнатомез зидди Эрон арзёбӣ хоҳад шуд. Изҳорот мегӯяд, ки дар сурати дубора ба хиёбонҳо рехтани эътирозгарон, онҳо бояд ба як муқовимати инқилобӣ омода шаванд. Вале тибқи хабарҳо, бо вуҷуди таҳдидҳо, имрӯз садҳо нафар дар маркази Теҳрон барои идомаи эътирозҳо аз натиҷаҳои интихоботи президентии рӯзи 12 июн, ки бо пирӯзии Маҳмуди Аҳмадинажод анҷомид, гирди ҳам омаданд.
Дар ҳамин ҳол, Шӯрои нигаҳбон, ниҳоди аслии қонунгузори Эрон эътироф кард, ки дар ҷараёни раъйдиҳӣ тақаллуб ҷой доштааст, вале он ба натиҷаҳои куллӣ таъсире нахоҳад дошт. Дар ҳамин ҳол вазири хориҷаи Итолиё гуфт, ки мехоҳад дар ҳамоҳангӣ бо дигар давлатҳои аврупоӣ дарҳои сафорати кишварашро дар Теҳрон ба рӯи эътирозгарони захмӣ боз кунад.
Инчунин имрӯз вазорати хориҷаи Бритониё гуфт, ки дар шароити идомаёбии хушунатҳо хонаводаҳои ҳамкорҳои худро, ки дар Эрон ба сар мебаранд, кӯч медиҳад.

Видеоҳои охирин

Ба мо нависед

Хабару акс ва видеоҳои худро аз тариқи IMO, Вайбер ва Вотсапп ба ин шумораи мо фиристед: +420 724 053 959

XS
SM
MD
LG