Пайвандҳои дастрасӣ

logo-print

Бархе аз хиёбонҳои Бангкок имрӯз ба майдони набард табдил шуданд. Aртиши Таиланд барои хатми тазоҳуроти мухолифин талош дорад.

Ба гуфтаи шоҳидон, сарбозон на фақат ба ҳаво, балки сӯи тазоҳургарон ҳам оташ кушодаанд. Субҳи имрӯз, 13-уми апрел, баъд аз бархурди низомиён бо тазоҳургарон дасти кам 70 нафар бо ҷароҳатҳои гуногун ба бемористонҳо интиқол ёфтанд. Гуфта мешавад, артиш баъди он аз силоҳ кор гирифт, ки шаби гузашта эътирозгарон сӯи онҳо санг ва шиша бо маводи сӯхт ё “коктейли Молотов” андохтанд.

Низомиёни кишвар ваъда доданд, ки тартибу низом дар пойтахтро барқарор хоҳанд кард. Фармондеҳи артиш генерал Сонгкитӣ Ҷагабатара дар як изҳорот аз тариқи телевизион эълом дошт, ки сарбозон “барои хатми бенизомӣ аз ҳама чораҳои зарурӣ кор хоҳанд гирифт”. Ҳамзамон, ӯ таъкид намуд, ки низомиён аз силоҳ фақат ба хотири дифоъ аз худ истифода мекунанд.

Тазоҳуроти “куртақирмизиҳо” ва ё ҷонибдорони сарвазири пешин Таксин Шиноватра дар пойтахти Таиланд чанд рӯз боз идома дорад. Эътирозгарон истеъфои сарвазир Абҳисит Веҷҷаҷиваро талаб мекунанд, ки ба гуфтаи онҳо, чаҳор моҳ қабл ғайриқонунӣ сари қудрат омада буд. Худи сарвазир шаби гузашта зимни суханронӣ аз тариқи телевизион аз эътирозгарон даъват кард, ки аз идомаи тазоҳурот даст бардоранд ва ба манзилҳои худ баргарданд.

Бо вуҷуди эълони вазъи изтирорӣ, ки дар як ҷо ҷамъ омадани беш аз панҷ нафарро мамнӯъ кардааст, дирӯз ҳам эътирозгарон ба хиёбонҳо рехта бисёр кӯчаҳои Бангкокро бастаанд. Як рӯз аз ин пеш бар асари ҳамлаи тазоҳургарон ба бинои вазорати умури дохила мақомот маҷбур шуданд, ки нишасти сарони мамолики узви АСЕАН - Иттиҳодияи кишварҳои Осиёи ҷанубу шарқиро мавқуф гузоранд. Шабакаҳои телевизионӣ наворҳоеро намоиш доданд, ки чӣ гуна сарони кишварҳо тавассути чархболҳо меҳмонхонаро тарк мегуфтанд. Дар намоишҳои эътирозии рӯзи шанбе тақрибан сад ҳазор аз ҷонибдорони Таксин Шиноватра ширкат доштанд.

Дар ҳамин ҳол, имрӯз мақомоти Фаронса, Бритониё, Австралия, ИМА ва чанд кишвари дигар аз шаҳрвандони худ хостанд, ки дар ин рӯзҳои ҳассос аз сафар ба Таиланд худдорӣ кунанд. Ин даъватҳо боиси нигаронии мақомоти Таиланд гардид, зеро даромади аслии кишвар аз ҳисоби фароғати сайёҳони хориҷист. Ҳукумат шаҳрвандони худ ва хориҷиёнро мутмаин месозад, ки вазъ таҳти назорат қарор дорад.

Абҳисит Веҷҷаҷива моҳи декабри соли гузашта баъди он ба мақоми сарвазири Таиланд расид, ки Додгоҳи олӣ дар пояи иттилоъ оид ба қонуншиканиҳо дар интихоботи парлумонӣ дар бораи пароканда кардани ҳукумати сарвазир Таксин Шиноватра ҳукм содир карда буд. Таксин Шиноватра, ки айни ҳол дар хориҷи кишвар ба сар мебарад, тавассути телефон аз ҷонибдоронаш даъват кард, ки рӯзи якшанбе инқилоб кунанд. Ва аммо, ба назар мерасад, ки инқилоб ба таъхир уфтодааст, зеро аз рӯзи душанбе таҷлил аз Соли нав бо тақвими таиландӣ шурӯъ шуд, ки се рӯз идома хоҳад кард. Тибқи хабарҳо, теъдоди бузурги сокинони Бангкок ба хотири таҷлили ин ид аллакай пойтахтро тарк карда ба музофотҳо рафтаанд.
XS
SM
MD
LG