Пайвандҳои дастрасӣ

Шаҳрдории Душанбе дархости Ҳизби наҳзати исломии Тоҷикистонро дар мавриди баргузории як ҳамоиш ба хотири дастгирии мардуми Фаластин дар низоъи Ғазза рад кард.

Як ҳафта қабл ҲНИТ бо ирсоли як номаи расмӣ ба ҳукумати Душанбе хостори иҷоза барои баргузории як ҳамоиши эътирозӣ алайҳи ҷанги Исроил бо фаластиниҳо дар навори Ғазза шуда буд. ҲНИТ мегуфт, ҳадаф аз чунин як тазоҳурот «эъломи ҳамдилӣ ва якраъйии ҳизб ва ҷонибдоронаш ба мардуми Фаластин ва маҳкум кардани амалиёти низомии Исроил алайҳи Фаластин» мебошад.

Ахиран, ҲНИТ ба ин мактуби худ аз шаҳрдории Душанбе посухи рад зери имзои муовини аввали шаҳрдор гирифтааст. Шаҳрдорӣ сабаби радди худро бо «иҷро накардани як қатор талаботи қонун оид ба баргузории ҳамоишҳо» аз ҷониби ҲНИТ шарҳ додааст.

Ин дуввумин дархости мушобеҳи Ҳизби наҳзати исломии Тоҷикистон барои ташкили намоиши эътирозӣ дар шаҳри Душанбе дар мавриди низоъи Исроил бо арабҳо дар ду соли ахир мебошад, аз сӯи шаҳрдории Душанбе рад мешавад.

Ҳизби наҳзати исломии Тоҷикистон дар охирин рӯзи соли гузашта дар қароргоҳи худ як ҳамоиши эътирозиеро алайҳи ҳамалоти ҳавоии Исроил ба навори Ғазза доир карда, хостори қатъи сареъи ҷанг шуда буд. Вазорати умури хориҷаи Тоҷиикистон низ бо нашри як баёния аз тарафҳои даргир даъват кард, ки фавран ва бе ҳеҷ қайду шарт оташбас эълон кунанд ва раванди музокиротро аз сар гиранд.

Дар бист рӯзи набардҳо дар навори Ғазза беш аз ҳазор фаластинӣ кушта шудаанд.

Машваратдодашуда

Намоиши шарҳҳо

XS
SM
MD
LG