Пайвандҳои дастрасӣ

Ҳадафи сафари Кондолиза Райс ба Лаҳистон


Кондолиза Райс

Кондолиза Райс

Кондолиза Райс, Котиби давлатии ИМА, имрӯз, 18-уми август, аз Варшава, пойтахти Лаҳистон, боздид мекунад.

Ҳадафи аслии ин сафари хонум Райс имзои созишномаи истиқрори як бахши сипари мушаки амрикоӣ дар қаламрави Лаҳистон будааст.
Қабл аз ин Райс дар нишасти паймони Атлантикаи Шимолӣ ё NАТО бахшида ба вазъи Гурҷистон дар Бруссел, пойтахти Белжик, ширкат хоҳад кард.
Дар ҳамин ҳол, Маскав қотеъона мухолифи нақшаҳои истиқрори сипари зиддимушакии Амрико дар наздикии марзҳояш мебошад ва бар ин аст, ки ин иқдоми Амрико ба амнияти миллии Русия хатар эҷод мекунад. Русия ҳушдор додааст, ки, агар ин сипар мустақар гардад, мили баъзе мушакҳои худро ба сӯи Ҷумҳурии Чех ва Лаҳистон мегардонад.
Вазири дифоъи Амрико Роберт Гейтс ин изҳороти мақомоти Маскавро “суханони бепояву асос” хонда гуфт, ки ин ҳама таҳдидҳои хушку холӣ аз сӯи Русияанд ва он кишвар ба ҳеч ваҷҳ ба Лаҳистон ҳамла нахоҳад кард, зеро Лаҳистон узви NАТО мебошад.
Таҳлилгарон масоъили сиёсӣ мегӯянд, ки баъд аз ҳаводиси Гурҷистон равобити Вошингтону Маскав рӯ ба сардӣ ниҳод ва тасмими Лаҳистон низ аз иқдомоти Русия дар мавриди Гурҷистон маншаъ мегирад.
Вошингтон пайваста эълом медорад, ки сипари мушакӣ дар Аврупои Марказӣ ва Шарқӣ алайҳи ҳамалоти эҳтимолии кишварҳои саркаш ба монанди Кореяи Шимолӣ ва Эрон равона шудааст ва барои амнияти Русия хатаре надорад.
Ёдовар мешавем, охири ҳафтаи гузашта мақомоти Лаҳистон барои истиқрори як бахши сипари мушакии ИМА дар қаламрави худ розӣ шудааст. Ба гуфтаи Доналд Туск, нахуствазири Лаҳистон, тавофуқ баъди он ҳосил гардид, ки Вошингтон ба таҳкими ҳамкории низомӣ бо Лаҳистон ризоят дод.
Баъд аз эълони ҳосили созиш миёни Варшава ва Вошингтон вазири умури хориҷаи Лаҳистон Радослав Сикорский хабар дод, ки ҳамтои русиаш Сергей Лавров сафараш ба Лаҳистонро, ки бояд моҳи сентябр сурат мегирифт, ба Варшава лағв кардааст.
Ин ҳам дар ҳолест, ки моҳи гузашта Котиби давлатии Иёлоти Муттаҳида Кондализа Райс ва вазири умури хориҷаи Ҷумҳурии Чех Карел Шверсенберг дар Прага ба созиш дар бораи мустақаршавии радари амрикоӣ дар қаламрави Чехия имзо гузоштанд. Тибқи нақша насби система бояд соли 2009 оғоз ёфта, дар солҳои 2012 ё 2013 ба кор дарояд, зеро, бино бар иттилоъи истихборотии Амрико соли 2015 Эрон қобилияти партоби мушакҳо ба қаламрави ИМА-ро ба даст хоҳад овард.
XS
SM
MD
LG