Пайвандҳои дастрасӣ

logo-print

НАСА эълом намуд, фазопаймои “Феникс”, ки дар Миррих ба таҳқиқот машғул аст, бо кашфи яхпораҳо мавҷуд будани об дар ин сайёраро тасдиқ кард.

Дар баёнияи худ пажӯҳишгари НАСА ва Донишгоҳи Аризона Вилям Бойтон гуфтааст, мушоҳидаҳои моҳвораи сунъии “Одиссей” ва фазопаймои “Феникс” дар моҳи гузашта гувоҳӣ медоданд, ки дар Миррих об ҳаст, ва акнун охирин иттилоъ аз “Феникс” инро таъйид кард.

“Феникс” рӯзи 25 май барои тахқиқи қаъри сайёра ба сатҳи Миррих фуруд омада буд. Аввал тарҳрезӣ шуда буд, ки маъмурияти “Феникс” дар Миррих танҳо се моҳ идома бикунад, аммо ҳамакнун олимони НАСА эълом намуданд, ки Оҷонсӣ мӯҳлати фаъолияти “Феникс”-ро то охирҳои моҳи сентябр тамдид мекунад. Онҳо гуфтанд, ки маъмурияти фазопаймо “самараи беназир”дошт ва бо ин сабаб НАСА тасмим гирифт, ки “Феникс” бояд боз чанд замон фаъолияташро давом диҳад.

Сарвари гурӯҳи илмии барномаи тахқиқи Миррихи НАСА Майкл Мейер ба хабарнигорон гуфт, ҳадафҳои ҳадди ақалли маъмурияти “Феникс” пурра анҷом шудаанд ва барои олимон ин “комёбии пурра” ғайримунтазира набуд. Вай афзуд, пеш аз ҳама маъмурият бисёр бомуваффақият буд ва дуввум ин аст, ки худи сайёраи Миррих таваҷҷӯҳи олимонро ҷалб мекунад.

“Феникс” аз замони ба Миррих фуруд омаданаш ба корҳои заминканӣ шурӯъ кард ва аллакай моҳи июн моддаеро пайдо намуд, ки дертар, баъд аз омӯзиши он олимон ба хулоса расидаанд, ки ях будааст.

Питер Смит аз Донишгоҳи Аризона иттилоъ дод, ки акнун мутахассисон порчаҳои яхро мавриди таҳқиқот қарор дода, имкони вуҷуди ҳаёт дар ин сайёраро омӯхтанианд. Вай гуфт, ки онҳо мехоҳанд, роҳҳои пайдошавии ин яхро биомӯзанд ва бифаҳманд, ки оё ин ях ягон вақт об шуда, таркиби хокро тағйир дода буд ё на. Ба қавли ҷаноби Смит, олимон гуё наворро ба ақиб чархонда, ба саволе посух доданианд, ки қарнҳо боз инсоният ба он таваҷҷӯҳи вижа зоҳир мекард. Манзураш ин аст, ки агар моддаи моеъ мавҷуд бошад, пас шояд ки дигар нишонаҳои ҳаёт низ дар ин саёйра пайдо шаванд.

XS
SM
MD
LG