Пайвандҳои дастрасӣ

logo-print

EURO-2008: Португалия ба даври чаҳорякниҳоӣ роҳ ёфт


Лаҳзае аз бозии байни дастаҳои Олмон (сафед) ва Лаҳистон (сурх)

Лаҳзае аз бозии байни дастаҳои Олмон (сафед) ва Лаҳистон (сурх)

Дар Австрия ва Швейтсария даври ниҳоии мусобиқоти қаҳрамонии футболи Аврупо ҷараён дорад.

Дар марҳилаи муқаддамотӣ 16 дастаи беҳтарини қорра дар чаҳор гурӯҳ рақобат мекунанд.
Дастаи миллии Португалия пас аз пирӯзиҳо бар тимҳои Туркия (2:0) ва Чехия (3:1) бо 6 имтиёз дар гурӯҳи «А» пешсаф мебошад. Барандаи медалҳои нуқраи Ҷоми Аврупо-2004 дастаи Португалия аввалин шуда ба бозиҳои чаҳорякниҳоӣ роҳ ёфт.
Дар ин гурӯҳ Чехия ва Туркия, ки 3-имтиёзӣ ба даст овардаанд, барои роҳхати дувум 14-уми июн бо ҳам рақобат хоҳанд кард. Вале дастаи мизбон Швейтсария, ки бидуни имтиёз дар зинаи охирин ҷой гирифтааст, сарфи назар аз натиҷаи бозии охиринаш бо Португалия (15-уми июн) аз ҳаққи идомаи мубориза барои Ҷоми Аврупо маҳрум гардид.
Дар гурӯҳи «В» Олмон ва Хорватия бо 3-имтиёзӣ пешсафанд. Австрия ва Лаҳистон ҳанӯз имтиёз нагирифтаанд. Дар даври дувум, 12-уми июн, дастаҳои Хорватия ва Олмон бо ҳам дар майдони рақобат рӯ ба рӯ мешаванд. Тими ғолиби ин бозӣ ба даври баъдӣ роҳ меёбад. Дар дидори Австрия ва Лаҳистон (12-уми июн) тими мағлубшуда аз ҳаққи ширкат дар даври чаҳорякниҳоӣ бенасиб мемонад.
Бозии Итолиё (кабуд) ва Ҳуланд
Дар гурӯҳи «С» пас аз даври аввал Ҳуланд бо 3 имтиёз дар ҷои аввал аст. Руминия ва Фаронса якимтиёзӣ ба даст овардаанд. Вале қаҳрамони феълии ҷаҳон – Италия – бидуни имтиёз дар зинаи охирин қарор дорад. Бозиҳои даври дувум 13-уми июн байни Италия – Руминия ва Ҳуланд-Фаронса баргузор хоҳад шуд.
Дар гурӯҳи «D» Испания ва Шветсия феълан бо 3-имтиёзӣ мутаносибан дар ҷойҳои якуму дувум қарор доранд. Юнон ва Русия ҳанӯз имтиёз надоранд. 14-уми июн дар даври дувум Суэд (Шветсия) бо Испания ва Юнон бо Русия бозӣ хоҳанд кард.
Бад-ин тартиб, аз 31 бозии даври ниҳоии Ҷоми Аврупо-2008 то имрӯз 10 бозӣ баргузор шуд. Футболбозон то имрӯз ҳамагӣ 21 гол ба самар расонданд. Давид Вилля (Испания) бо 3 гол алъон беҳтарин нишонзани мусобиқот ба шумор меравад.
Бар асоси низомномаи мусобиқот, аз ҳар гурӯҳ ду дастаи беҳтарин ба бозиҳои чаҳорякниҳоӣ (19 - 22-вуми июн) роҳ меёбанд. Бозиҳои ниманиҳоӣ рӯзҳои 25-ум ва 26-уми июн сурат мегиранд. Бозии ниҳоии Ҷоми Аврупо-2008 29-уми июн дар варзишгоҳи Эрнст-Ҳаппели шаҳри Вена, пойтахти Австрия, баргузор хоҳад шуд.
XS
SM
MD
LG