Далай-лама, ки феълан дар хиҷрат ба сар мебарад, ҳама иддаъоҳои мақомоти Пекинро, ки гӯиё вай ба ҷудошавии Тибет аз Чин даъват кардааст ва сарзадани хушунатҳоро ангезиш додааст радд намуда гуфт, ки, баракс, тарафдори дастёбии Тибет ба худмухторӣ дар таркиби Чин мебошад. Вай дар нишасти матбуъотӣ дар шаҳри Сиэтли ИМА изҳор намуд, ки тамоми ҷаҳон медонад Далай-лама роҳҳои соҳибистиқлолӣ ва ҷудошавиро намеҷӯяд. Ӯ даъват кард, то Пекин ҳамлаҳоро болои ватанаш коҳиш диҳад.
Дар инҷо Далай-лама, аз ҷумла, гуфт, ки мардуми Тибет алайҳи баъзе мақомдорони чиноӣ мубориза мебарад, на бо мардуми Чин. Раҳбари Тибет изҳори нигаронӣ кард, ки, агар вазъи дар Тибет баамаломада идома ёбад, ҳукумат ба онҷо нерӯи бештар ворид намуда, мардуми Тибетро азияти бештар медиҳад.
Раҳбари рӯҳонии буддоиён афзуд, ки, агар Чин юришашро мутаваққиф кунад, дар ин ҳол вай ба мардуми Тибет машварат хоҳад дод, то эътирозҳоро хотима диҳанд.
Ин ҳам дар ҳолест ки, С. Ҳадлӣ, мушовири раисҷумҳури ИМА дар умури амнияти миллӣ, изҳори ақида кард, ки, агар бархе кишварҳо бо нишони эътироз ба саркӯбиҳо дар Тибет аз ширкат дар маросими ифтитоҳи Бозиҳои Олимпии Пекин худдорӣ кунанд, ин як гурези номардона аз воқеъият хоҳад буд. Дипломатияи оромонае, ки ҳукумати Амрико ба он пайравӣ мекунад, гуфт ӯ, дигар роҳеро дар назар дорад ва дар ивази мухолифати рӯирост беҳтар аст ба сарварони Чин паёме фиристод.
Дар ҳамин ҳол, Ҷорҷ Буш, президенти ИМА, дар мавриди имкони сарфи назар карданаш аз ҳузур дар маросими ифтитоҳи олимпиада ягон ишорае накардааст. Ҳафтаи гузашта расиҷумҳури Амрико ба такрор эълом намуд, ки Бозиҳои олимпӣ ин рӯйдоди ғайрисиёсӣ ва сирф варзишист. Бо вуҷуди ин, Кохи Сафед то ба ҳол ширкати Ҷорҷ Бушро дар ин маросим тасдиқ ё такзиб накардааст.